«Кніга-крык»: паэтка Ганна Комар у Лондане прэзентавала зборнік вершаў «Мы вернемся» паводле гісторый беларусаў

Прэзентацыя кнігі Ганны Комар «Мы вернемся» адбылася ў Скарынаўскай бібліятэцы ў Лондане.

Зборнік з дваццаці дакументальных вершаў напісаны паводле гісторый беларусак і беларусаў, якія пакінулі краіну цягам года пасля пачатку пратэстаў у 2020-м.

Беларуская паэтка распавяла на прэзентацыі, у які момант нарадзілася ідэя зборніка, і чаму паўстала менавіта такая форма паэтычнага выказвання – дакументальны верш.

«Гэта была яшчэ вясна 2021 года – людзі з’язджалі, і з’яджалі з Беларусі, і ў маім фэйсбуку перыядычна ўзнікалі скаргі на тое, як добра жывуць тыя, хто з’ехалі, – дзеліцца аўтарка. – А мне было не зразумела: што гэта за людзі, якія добра жывуць? Бо мае сябры перажывалі той досвед [ад’езду] давольна эмацыйна».

Тады ў Ганны Комар з’явілася ідэя праінтэрв’юіраваць людзей, якія з’ехалі, і напісаць адзін доўгі верш з іхніх словаў.

«Адзін – агульны, – кажа яна. – Але калі я сабрала інтэрв’ю, то зразумела, што такі верш не атрымаецца, бо кожная гісторыя – унікальныя, і ў кожнай гісторыі – ёсць паэзія. І я мушу расказаць гэтыя гісторыі, бо я – паэтка».

Ганна дадае, што, па сутнасці, брала пісьмовыя інтэрв’ю, а потым сядзела і займалася «мантажом».

«Састаўляла словы, выразала, склейвала…  Як ёсць мантаж у дакументальным фільме, – тое [адбывалася] з тэкстам, – прызнаецца яна. – Таму я кажу зараз, што мы напісалі гэтую кнігу: тыя дваццаць чалавек беларусаў і беларусак, чые імёны пазначаны на вокладцы, і я».

«.. кніга – нацягнуты нерв, кніга-крык, – выказалася аб новым выданні чытачка Вольга. – Ганна зрабіла паэзію з крыкаў адчаю тых, хто крычаў, альбо ўжо не мог крычаць. І зараз для мяне «Мы вернемся» – гэта прыклад, як можна рабіць літаратуру з крывавага, з таго, што яшчэ жывое б’ецца ў тваіх далонях. Такая літаратура будзе біцца доўга!».

«Адчуванне, што паглядзела дакументальнае кіно. Па глыбіні і шчыльнасці. Амаль бачу іх – [герояў кнігі], – падзялілася сваімі ўражаннямі чытачка Ганна.

Зараз набыць зборнік дакументальных вершаў Ганны Комар «Мы вернемся», якая была надрукавана ў Скарынаўскім выдавецтве, можна па ўсім свеце. Дастаткова зазірнуць на старонку выдавецтва.

Нагадаем, што Ганна Комар – аўтарка паэтычных зборнікаў «Страх вышыні» і «Recycled». Асобныя творы літаратаркі перакладзеныя на ўкраінскую, польскую, рускую, шведскую, нямецкую, нарвежскую, чэшскую, англійскую мовы.

Падпісвайцеся на культурныя навіны Reform.by у Telegram