Адукацыйны праект “Васьміног” падтрымаў ініцыятывы “новай адукацыі” на суму больш за 280 тысяч еўра

285 916 еўра – праекты на такую суму падтрымае адукацыйная праграма “Васьміног” па выніку конкурсу на стварэнне і падтрымку ініцыятыў “новай адукацыі”. На конкурс ад “Васьмінога: адукацыя для беларускіх дзяцей сёння і заўтра” было пададзена 113 заявак, і як адзначаюць арганізатары, колькасць і якасць прапаноў уражвала.

“Каб зразумець, наколькі складана было выбіраць пераможцаў, прывядзем такі факт: агульная сума, якую заклалі ў бюджэтах усе 113 заяўнікаў, складае 3 811 200 еўра. То-бок беларуская грамадзянская супольнасць, дыяспары і педагогі для рэалізацыі сваіх задумаў маюць патрэбу ў суме, якая ў 10 разоў перавышае цяперашнія магчымасці “Васьмінога”, – апісала сітуацыю каманда “Васьмінога”.

“Уразіла не толькі колькасць заявак, але і разнастайнасць прапанаваных кірункаў дзейнасці і відаў актыўнасці, – падзялілася сваімі ўражаннямі адна з экспертак, якая працавала над заяўкамі. – Сярод заяўнікаў было шмат вядомых навукоўцаў і педагогаў, дзеячаў культуры і навукі. Цэлыя зорныя калектывы. Шмат было таксама дэбютантаў са свежымі ідэямі. Конкурс быў сапраўды спаборніцкім, цікавым і напружаным…”.

У выніку ў сітуацыі вострай канкурэнцыі былі адабраныя 15 з 113 праектаў, рэалізацыя якіх, па меркаванні “Васьмінога”, істотна паўплывае на адукацыйную сферу ў Беларусі. Яшчэ 19 праектаў атрымалі рэкамендацыі для паляпшэння заявак, якія можна будзе падаваць на новым конкурсе.

Гранты будуць вылучаны на наступныя адукацыйныя праекты:

• Навучанне дзяцей школьнага ўзросту з аўтызмам;
• Стварэнне адукацыйнага і інавацыйнага відэакантэнту для вывучэння беларускай мовы і гісторыі, гуманітарных дысцыплін для школьнікаў;
• Беларускамоўны падкаст па біялогіі (серыя крэатыўных перадач для школьнікаў);
• Распрацоўка праграмнага зместу гісторыка-грамадазнаўчага і філалагічнага блоку для настаўнікаў;
• Стварэнне падручніка па геаграфіі для старэйшых класаў;
• Падтрымка падлеткавага клуба;
• Арганізацыя летніка і нядзельнага клуба для беларускіх школьнікаў у Літве і Польшчы;
• Падтрымка некалькіх школ выхаднога дня ў розных гарадах і краінах.

Апроч пералічаных напрамкаў, будуць падтрымлівацца навучанне настаўнікаў інавацыйным метадам выкладання.

Пры адборы грантаатрымальнікаў арганізатры імкнуліся таксама ўлічваць “геаграфічны” прынцып, каб былі падтрыманыя ініцыятывы беларускіх дыяспар у розных краінах знаходжання. Так, сярод пераможцаў конкурсу – жыхары Польшчы, Літвы, Грузіі, Нямеччыны, Эстоніі і Беларусі.

Кіраўнік праекта “Васьміног” Аляксей Канстанцінаў заўважыў, што некаторым заяўнікам не хапіла вопыту для складання праектных прапановаў: “Істотная частка заявак сфармулявана і аформлена з мноствам памылак. Мы разумеем, што шмат якія адукацыйныя ініцыятывы ўпершыню пісалі грантавыя заяўкі, а гэтая праца патрабуе пэўных кампетэнцый. Мы разумеем гэта як запыт і задачу на развіццё арганізацыйнага патэнцыялу. Мы таксама разлічвалі на большую колькасць інавацыйных праектаў, але большая частка атрыманых заявак абапіраецца на традыцыйныя практыкі і інструменты адукацыі”.

Увосені 2023 года будзе абвешчаны чарговы конкурс грантавых праектаў для адукацыйных ініцыятыў, на які можна будзе дадаць дапрацаваныя і новыя заяўкі, звяртаюць увагу арганізатары.

Нагадаем, што агульная мэта конкурсу ад “Васьмінога” – распрацоўка, умацаванне жыццяздольнасцi і даследаванне элементаў “новай адукацыі” (навучальныя праграмы, методыкі, арганізацыйныя мадэлі) для дзяцей у Беларусі ці ў транспамежным анлайн-фармаце. У прыярытэце таксама падтрымка беларускіх нефармальных адукацыйных арганізацый і ініцыятываў і кароткатэрміновых праектаў мерапрыемстваў, якія дзейнічаюць як у Беларусі, так і ў эміграцыі, афлайн і анлайн.

Праект “Васьміног: адукацыя для беларускіх дзяцей сёння і заўтра” быў ініцыяваны Міжнародным кансорцыумам “ЕўраБеларусь”, Офісам Святланы Ціханоўскай і Беларускай Радай Культуры. Ягоная афіцыйная прэзентацыя прайшла ў Вільні 12 студзеня 2023 года. “Васьміног” адкрывае новыя магчымасці для беларускіх школьнікаў і настаўнікаў як унутры краіны, так і за мяжой. Праект фінансуецца Еўракамісіяй.

Падпісвайцеся на культурныя навіны Reform.by у Telegram