“Еўрапейская суперстар”: у сеціве з’явіўся анімайцыйны кліп пра Францыска Скарыну

Яскравае відэа ў год 500-годдзя выдання “Малой падарожнай кніжыцы” беларускага асветніка і першадрукара Францыска Скарыны стварыў Беларускі офіс імя фонда Конрада Адэнаўэра (KAS Belarus).

Песню “European Superstar Francysk Skaryna” выконваюць нямецкі музыка і грамадскі дзеяч Якаб Веленштэйн (Jakob Wöllenstein) і легенда беларускага року Лявон Вольскі.

KAS Belarus, які зараз знаходзіцца ў Вільні, некалькі раз на год выпускае музычныя кліпы сацыяльнай і асветніцкай скіраванасці. Гэтым разам у арганізацыі з’явілася ідэя “паказаць пераканаўчую сувязь Беларусі і Еўропы” на прыкладзе асобы беларускага гуманіста, лекара, перакладчыка, які жыў, вучыўся і ствараў у розных гарадах Еўропы.

“Мы адразу вырашылі, што European Superstar — гэта Францыск Скарына, – дзеліцца гісторыяй стварэння кліпа KAS Belarus. – Для нас было важна, каб у Скарыне перасталі бачыць персанажа падручніка гісторыі, акружанага датамі і званнямі, але ўбачылі жывога чалавека, беларуса, які прайшоў складаны шлях і пакінуў значны ўнёсак не толькі ў беларускай, але і ў еўрапейскай гісторыі”.

“Многія беларусы зараз паўтараюць шлях Францыска Скарыны і гэтаксама робяць свой унёсак у гісторыю розных краін і гарадоў”, – дадае KAS Belarus.

Над анімацыяй у кліпе працавалі Маргарыта Ціхановіч, Аляксандра Хутная.

Стваральнік відэа – рэкламная агенцыя “Moloko”.

Падпісвайцеся на культурныя навіны Reform.by у Telegram