“Гэта кніга цяпла і памяці”: заўтра ў Варшаве адбудзецца прэзентацыя паэтычна-графічнага зборніка “Побач” Насты Кудасавай і Святланы Дземідовіч

Ілюстраваны збор вершаў “Побач” паэткі Насты Кудасавай і мастачкі Святланы Дземідовіч будзе прэзентаваны заўтра, 24 красавіка, у Варшаве ў Старамесцкім Доме культуры.

“Побач” – гэта першая кніга новага беларускага імпрынта Skarynyčy ў Польшчы. Выданне доўга чакалі, і, нарэшце, праца аўтарак атрымала ўвасабленне ў выглядзе прыгожага паэтычнага зборніка, аздобленага чорна-белымі графічнымі выявамі.

“Кніга “Побач” – гэта ілюстраваны збор вершаў, які распавядае пра адзіноту і надзею, пра пошук сябе і радзімы ў шалёных варунках рэчаіснасці, – так гучыць анатацыя да выдання. – Нітуючы асабістае і гістарычнае, моўнае і візуальнае, зборнік паказвае шматаблічны свет растрывожанага сучаснасцю чалавека: ад роспачы і зняверанасці да захаплення жыцццём. Гэта кніга цяпла і памяці, кніга дарогі і станаўлення. Застацца “побач” на гэтым шляху – значыць захаваць чуласць, не згубіць у полі зроку іншага чалавека, не адвярнуцца адно ад аднаго”, – адзначаецца ў апісанні.

Падчас прэзентацыі зборніка і сустрэчы з аўтаркамі можна будзе купіць і падпісаць кніжку, паслухаць вершы Насты Кудасавай, “пагаварыць, абняцца, пабыць побач”, – запрашаюць на імпрэзу творцы.

Час сустрэчы – 24 красавіка, 18.00. Месца – Варшава, Старамесцкі Дом культуры (Rynek Starego Miasta, 2).

Падпісвайцеся на культурныя навіны Reform.by у Telegram