У Зэльве ўсё ж дэмантавалі помнік Ларысе Геніюш

У Зэльве ўсё ж дэмантавалі помнік Ларысе Геніюш, які стаяў пры мясцовай царкве. “Хто аддаў загад на яго ліквідацыю – царкоўна-эрпэцэшныя ўлады ці прадстаўнікі дзяржаўнай „вертыкалі” – пакуль невядома” – паведамляе радыё “Рацыя”.

Пра дэмантаж помніка паведаміў унук Ларысы Геніюш Міхась Геніюш, які даслаў у рэдакцыю радыё фота месца, дзе стаяў помнік.

Помнік Ларысе Геніюш патрабавала ліквідаваць прарасейская актывістка Вольга Бондарава. Учора стала вядома, што мясцовыя ўлады адмовілі ў зносе помніка, які быў усталяваны пры зэльвенскай царкве з блаславення мітрапаліта Філарэта ў 2003 годзе.

Аднак цяпер на фотаздымку відаць, што помнік на сваім месцы адсутнічае.