Заўтра ў Сопаце пачынаецца Mara fest

«Беспрэцэдэнтны» музычны фестываль Mara Fest 2023 заўтра пачынае сваю працу ў амфітэатры Лясная Опера ў Сопаце. «Чаму беспрэцэдэнтны? Таму што мы марылі пабудаваць упершыню ў гісторыі ў Сопаце сяброўскае месца для людзей добрай волі з Украіны, Польшчы і Беларусі», – адзначаюць яго арганізатары.

У праграме фестывалю – музыка, мастацтва, спорт, дабрачыннасць, актывісцкія праекты.

У музычных хэдлайнерах падзеі – Sarsa, Brodka, Іван Дорн, Ляпiс Трубецкой, Navi Band, Intelligency.

Заяўлена сцэна блогераў, дзе выступяць: Аляксандр Івулін, Ліза Закрэўская, Цімур Мірашнічэнка, Катажына Конечка.

Будзе працаваць Студыя псіхічнага здароўя, Зона НКО, Арт Сцэна, Sport Point, Пляцоўка для дзяцей.

Адной з асноўных мэт Mara Fest 2023 з’яўляецца падтрымка жыхароў Украіны. Таму частка прыбытку ад мерапрыемства будзе пераведзена на рахунак дабрачыннай арганізацыі Фонд «Маша», якая дапамагае пацярпелым маці і дзецям з Украіны.

Фонд «Маша» – грамадская арганізацыя, створаная ў 2020 годзе для процідзеяння ўсім відам гвалту. З пачатку ўварвання Расіі ва Украіну фонд дапамагае жанчынам і дзецям, якія пацярпелі ад вайны, пераадолець псіхалагічныя наступствы ваенных траўмаў.

Квіткі на фестываль яшчэ можна набыць па спасылцы.